ភ្នំពេញ៖ ក្រសួងបរិស្ថានបានណែនាំដល់ពលរដ្ឋកុំដុតរានព្រៃ វាលស្មៅ សំណល់កសិកម្ម គល់ជញ្ជាំង សំរាម-សំណល់រឹង និងការដុតសំណល់ផ្សេងៗទៀតនៅទីចំហ ពីព្រោះអាចបង្កជាផ្សែងពុលប៉ះពាល់ដល់បរិស្ថាន និងបង្កជាអគ្គិភ័យកើតឡើង។

ក្រសួងបរិស្ថានបញ្ជាក់ថា ថ្វីបើគុណភាពខ្យល់នៅកម្ពុជាមានភាពល្អប្រសើរគិតត្រឹមថ្ងៃ១៦ ខែមករា ឆ្នាំ២០២៤ នៅរដូវប្រាំងខាងមុខនេះក្រសួងណែនាំអាជ្ញាធរចាត់វិធានការទប់ស្កាត់ការដុតសំណល់ផ្សេងៗ និងករណីភ្លើងឆេះព្រៃ ជាមួយគ្នានេះរួមគ្នាសម្អាតធូលី និងធ្វើអនាម័យនៅតាមដងផ្លូវ និងទីសាធារណៈឱ្យបានជាប់ជាប្រចាំ។

ក្រសួងកសិកម្ម រុក្ខាប្រមាញ់ និងនេសាទក៏បានណែនាំពលរដ្ឋដែលនិយមទៅយកឃ្មុំក្នុងព្រៃ ប្រុងប្រយ័ត្នក្នុងការប្រើប្រាស់ភ្លើងសម្រាប់ជាមធ្យោបាយដើម្បីចម្អិនអាហារ យកឃ្មុំ ការដុតស្មៅព្រៃ ការប្រមូលផលអនុផលព្រៃឈើ ខណៈរដូវប្រាំងឆ្នាំនេះមានសភាពក្តៅហួតហែងខ្លាំងដែលជាកត្តាងាយបង្កនូវភ្លើងឆេះព្រៃដែលបង្កឡើងដោយកត្តាមនុស្ស៕